Igerileku txikiko itoginak kentzeko lanetan dabiltza


2011-09-30 11:26:33 Mireia Bikuña

Igerilekua itxita dago. Osakidetzak urtean bitan agintzen duen garbiketa sakona egiteko epea aprobetxatuz, hainbat lan egiten dihardute igerileku txikian. Aspalditik itoginak ditu, eta horiek konpontzen dihardute. Hori horrela, igerilekua itxita egongo da urriaren 10era arte. Atzerapenik ez badago, egun horretan hasiko dituzte igeriketa ikastaroak eta ur-ekintzak.

Hiru dira igerileku txikian egiten diharduten lanak: alde batetik, metro bateko zabaleran baldosa kendu dute eta asfaltozko estaldura berria ipiniko dute; beste alde batetik, igerileku txikiaren inguruan dagoen kanaloia berrituko dute; eta azkenik, igerileku barruko inpultsio ahoak ondo lotu eta hoditeria barruan asfaltozko estaldura ipiniko dute.

Lan horiek guztiak egin arren, ez dute itoginak desagertuko diren berme osoa.

Kanalizazio berezia

Itoginek eragin zuzena zuten kiroldegiaren beheko solairuko hainbat lekutan; besteak beste, makineria gelan, mutilen aldagelan eta aldagela mistoan. "Egoera tamalgarria da. Mutilen aldagelako paretak bustita daude, eta aldagela mistoan bost edo sei itogin", esan digu Carrascalek.

Itoginetako ura jasotzeko kanalizazio berezia egin behar izan zuten kiroldegian. "Biltegi batean jasotzen dugu itoginetatik datorren ura. Kantitate handia erortzen da zenbait lekutan", esan digute.