Aloña Mendi Gimnasia Erritmikoa

Uztaiak eta pelotak hartuta fan zian zapatuan gure alebin eta infantilak Azkoitiko teknifikazio jardunaldira. 
Gauza barri pillatxo bat ikasitta bueltau dia, gogotsu fan zian eta!

Gimnasia Erritmikoa

2015-01-13 18:28:43

100 KIROLARI DITU GAUR EGUN SAILAK

Gimnasia Erritmikoa; etengabe haziz doan familia

Aloña Mendiko Gimnasia Erritmikako saila, protagonista izan zen atzo arratsaldean Oñati Irratian. Urteko lehen kirol tarte nagusian, saileko hiru kide elkarrizketatu zituzten eta. Klubaren egungo egoera aztertzeaz gain, denboraldiko hainbat datu eta xehetasun ere eman zituzten gonbidatuek. Medioetan gutxi agertzen diren arren, lana gogotik eginez jarraitzen dute eta gaur egun, 100 kirolariko familia handia osatzen dute.

Kirol apala edo xumea izanagaitik ere, erabat osasuntsu dago Aloña Mendiko Gimasia Erritmikako saila. Gaur egun 4 eta 17 urte bitarteko 100 kirolari inguru mugitzen ditu eta denboraldi guztian zehar hainbat erakustaldi eta txapelketatan parte hartuko dute. Prebenjamin, benjamin -bi maila hauetan daude gimnasta gehienak-, alebin, infantil, kadete eta jubenil mailan dituzte ordezkariak.

Azken bi maila horietan daude saileko gimnasta zaharrenak. Amy White (kadete maila) eta Laura Quelle (Jubenil maila) dira eta bi protagonistak Lide Osinaga entrenatzailearekin batera, Oñati Irratiko estudietan izan ziren atzo arratsaldean. Ordubeteko solasaldian zehar, sailari eta beraiei buruzko informazio ugari eman zuten.

Ekintza berriak

Lide Osinagak hiru denboraldi daramatza saileko entrenatzaile gisa eta ardura hori hartu zuenetik, ekaineko ohiko erakustaldiaz gain, beste hainbat ekintza ere sartu nahi izan ditu denboraldian zehar. Aurten esaterako, Gaztea Dantzan lehiaketan parte hartu zuten bideoklip bat grabatuz. Azaroa amaieran, berriz, GBC-ren partiduan erakustaldia egin zuten eta gabonetan, jaialdi berezia prestatu zuten Zubikoa kiroldegian.

Aurrera begira hainbat nobedade egongo direla ere aurreratu zuen Osinagak: «Benjaminak, kategoriako topaketetara joango dira eta alebinekin ere, beste irteera bat antolatu nahian gabiltza. Hala ere aurtengo nobedade nagusia, infantil, kadete eta gazte mailan izango dugu. Maila hauetako gimnastak txapelketa ofizial batetara irtengo baitira. Azkenik urtero bezala, ekainean etxean bertan erakustaldia eginez agurtuko dugu denboraldia» adierazi zuen entrenatzaile oñatiarrak.

Aldaketak datozen hileotan

Datozen hileotan saileko estrukturan aldaketa batzuk egin beharko dituzte ezinbestean. Lide Osinaga entrenatzailea, haur baten esperoan dago eta horrek, eguneroko funtzionamenduan eragin zuzena izango duela aurreratu zuen atzoko elkarrizketan. Dedikazioa murriztu egin beharko du Osinagak eta honek utzitako hutsunea, Laura Quellek beteko du.

Kontu guzti hauen artean, gimasta bakoitzak bere helburuak azaldu zituen eta solasaldi erdian, presidentearekin hitz egiteko aukera ere izan zuten. Hemen daukazue elkarrizketa osoa entzungai:

Gimnasia Erritmikako aurtengo talde argazkia