Oñatiko EHBildu

Oñatiko EHBildu koalizioak bat egiten du uztailak 7rako "Birziklatzeari

zentsurarik ez; Gipuzkoa aldatzen ari gara" lelopean burutuko den

manifestaldiarekin eta bertara joateko dei egiten diogu jendarteari.

Horretarako autobusa antolatu da Oñatitik, manifa Donostian izango da

17:30etan eta autobusa 15:30etan atarako da Korreosetik. Izena arrano

tabernan eman daiteke. Zabaldu kontaktuen artean.

Hemen daukazue deialdiaren irakurketa politikoa:

Egun gutxi barru, EAJk, PSEk eta PPk Juan Karlos Alduntzin Gipuzkoako

Ingurumen diputatuaren aurkako zentsura mozioa onartuko dute. Honen

aurrean, EH Bildu koalizioa osatzen dugunok ez ginela geldirik geratuko

iragarri genuen eta, gaurko agerraldi honen bitartez, oposizioak blokean

hartu duen bide horren aurrean gure desadostasuna agertzeaz gain, hiru

alderdi horien jarrera salatzeko mobilizazio bat deituko dugu.



Ezer baino lehen komeni da gogoaraztea nola iritsi garen zentsura mozio

honetara. Oposizioak, orain dela oso aste gutxi arte, Gipuzkoa geldirik

zegoela zioen, Diputazioa ez zela Gipuzkoako arazoei konponbidea

aurkitzeko gai eta abar eta abar. Baina hondakinekin dugun arazoa behingoz

konpontzeko gai den plan integrala mahai gainean jarri denean, orduan hasi

dira urduritasunak eta kontraesanak eta, ondoren, inoiz inon ikusi ez den

ekimen bateratu bat abiatu dute EAJk, PSEk eta PPk: diputatu baten aurkako

zentsura mozioa.





Zer proposatzen du bada plan horrek, bere aurkezpenak horrelako ezinegona

sortarazleko oposizioan? Hitz gutxitan laburbilduz, konponbidea dugu esku

artean, eta, gainera, 200 miloi euro gutxiago kostatuko da, erdia

alajaina, eta Europako ebazpenetan oinarritzen da, hau da, birziklatzean,

eta ez hondakinen errausketan. Horixe da gakoa: plan hau oso egingarria

eta errealista da, ez da utopikoa. EAJ, PSE eta PP laster jabetu dira

planaren potentzialtasunaz eta hori ezkutatzeko, zarataka eta espantuka

hasi dira, benetako eztabaidari ihes egiteko.





Errauste plantak ez zeukala alternatibarik esan eta esan ibili dira

Gipuzkoan azken hilabetetan. Baina erakutsi digute baietz, badagoela beste

aukera ekologikoagoa eta eramangarriagoa, eta gaur egun Zubietan errauste

planta bat eraikitzea zentzugabekeria galanta dela. Alde batetik,

gipuzkoarrok ez dugulako gaur gaurkoz horrelako azpiegiturak behar dituen

adina hondakinik ekoizten. Martxan hasi bezain pronto hondakinak

inportatzen hasi beharko litzateke. Bizkaiko Zabalgarbi errauste planta

jada egoera horretan dago, eta EH Bildu ez dago prest horretarako, inondik

inora.





Beste aldetik, Europako ebazpenak daude. Jakina den bezala, 2020 baino

lehenago birziklatu daiteken guztia birziklatu behar da, eta ezingo dira

erraustu ez eta isuri. Hori denok argi badaukagu, eta, ondorioz, errefusa

erretzeko errauste planta planteatzeak, zentzugabekeria baino,

gipuzkoarrei iruzurra egitea da.





Beraz, argi dago errauste plantaren eraikuntzaren atzetik beste interes

ekonomiko eta politiko batzuk daudela. Lobby ekonomikoa eta EAJ, PSE eta

PP gipuzkoarren interesak alde batera uzten ari direla. Gaur zentsura

mozioa da, baina argi dago hau ez dela ekimen isolatua. EH Bilduren

aurkako estrategia komun batean kokatu behar da zentsura mozioa. EAJ, PSE

eta PP hirukotearen asmoak argi daude: ezkerreko soberanista eta istaren

aurkako fronte bat osatzea eta Gipuzkoan abian den aldaketa politiko eta

soziala gelditzea.



Haatik, Gipuzkoan aldaketa politiko eta soziala sendotzen ari da. EH Bildu

koalizio berriak politika egiteko beste era bat ekarri du, herritarrekin

eta herritarrentzat. Euskal Herrian bizi dugun aro politiko berria

osasuntsu dago Gipuzkoan, eta gure kaleetan bakera eta demokraziara doan

bidean aurrerapausoak ematen ari gara etengabe. Baina EAJ, PP eta PSE

oraindik ez dira aro berri honetara iritsi, iraganari lotuta jarraitzen

dute, eta oraindik ez dira gai izan egoera politiko berri honetan

kokatzeko.



Eta honetan guztian EAJren jarrera bereziki kezkagarria da. Azkeneko udal

hauteskunde kanpainan, 2011an, "batu gaitezen" leloa erabili zuen,

erabakitze eskubidearen aldeko batasuna aldarrikatuz. Urtebete geroago,

ordea, badakigu zein den beraien lehentasuna: iraganeko status quo

mantentzea, eta horretarako PSE eta PPrekin batu da. Gipuzkoan erabakitze

eskubidearen inguruko gehiengo berriak osatzeko urratsak eman beharrean,

herri honen hitza behin eta berriz ukatzen dutenekin batu da. Gaur

Alduntzinen aurkako mozioa da, baina aste honetan, ikusi ere egin ez duten

euskal presoei buruzko film bat zentsuratu zuten Donostiako udalean,

berriro ere PP eta PSEren eskutik. EAJ edozeinekin paktatzeko gai da denak

berdin jarrai dezan.





Eta zentsura moziora itzuliz, benetan neurriz kanpokoa dela nabarmendu

behar dugu. Horrelako mozioak, lapurretak egin dituzten politikarientzat

pentsatuta daude. Eta ezin da ukatu Gipuzkoan horrelako ekimena merezi

izan duten bestelako kasuak egon direla, Bidegiren kudeaketa, adibidez.

Baino ez EAJk, ez PPk eta ez PSEk ez dute horretarako beharrik sentitu,

eta lehen aldiz zentsura mozio bat bere programa betetzen duen diputatu

bati ezarriko diote.





Egoera honek herritarren artetik erantzun bat merezi du. Zentsura mozioa

Batzar Nagusietan uztailak 6an tratatuko da, eta datu guztien arabera,

aurrera aterako da. EH Bilduk Gipuzkoar guztiei dei egiten die hurrengo

egunean, uztailak 7 larunbata, arratsaldeko 17:30etan Donostiako

Boulebard-etik "Birziklatzeari zentsurarik ez; Gipuzkoa aldatzen ari gara"

lelopean egingo den manifestazioan parte hartzeko.



Oñatiko EHBildu