'Hots-larretan'

 GABONAK 2014
ABENDUAK 19 SANTA ANA ANTZOKIAN 22:30

Juan Mari Beltranek 'Hots-larretan' diskoa plazaratu du

• felix ibargutxi | DONOSTIA

 

Juan_Mari Beltranek ‘Hots-larretan’ diskoa plazaratu du, neurri handi batean aurtengo abuztuan Donostiako Musika Hamabostaldian eskainitako izen bereko ikuskizun multidiziplinarra islatzen duena. «Hotsen arteko jolasak» datoz diskoan, Beltranek adierazi duenez. Era askotako materialak eta musika-tresnak daude bertan: Mendukilo kobazuloan egindako txalaparta-saioa, putre-hezur batean moldatutako flautarekin egindako doinuak (Isturitzeko aspaldiko musika-tresna haietatik ateratzen ziren hotsak berrituz), Txillidalekuko eskultura baten barruan mailuen bidez egindako inprobisazioak, Andoni Salamero poetaren hitzak, Pello Ramirezen txeloa, Errege Beldaren akordeoia...

Syntorama diskoetxearen bidez plazaratu du emaitza. Eta diskoan produktore-lanean, berriz, Suso Saiz entzutetsua jardun da, Beltranen azkenaldiko diskoetan bezalaxe.
Hilaren 19an Oñatiko Santa Ana aretoan entzun ahal izango dira diskoko soinu eta doinuak. Grabazio honetan ageri ez diren osagai batzuk ere han izango dira, hala nola Kukai taldeko dantzari batzuen urratsak eta Andoni Salameroren errezitaldi batzuk.
Ibilbide benetan luzea duen musikaria da Juan Mari Beltran (Etxarri-Aranatz, 1947). Diskoak dozenatik gora argitaratu ditu. Gazte-gaztetan, Etxarri-Aranatzen ibili zen txistulari. Ondoren, Argia taldean musikari egon zen. Hernaniko Musika Eskolan alboka, dultzaina, txalaparta eta txistuaren irakasle ibili da hainbat urtez. Euskal Musika tradizionalaren gaur egungo ikerle garrantzitsuenetarikoa da, eta Oiartzunen badu ikerketa-zentroa, Herri Musikaren Txokoa deritzana, non mundu osoko soinu-tresnen bilduma oso zabala ere baduen.