Espainia mailako lasterkari onenen artean lehiatuko dira gaur bost korrikalari oñatiar

 OKMAGAZINEA

Atletismoa

2014-03-16 01:19:09

MERIDA ETA AIGUAFREDAN (KATALUNYA), OSPATUKO DIRA LASTERKETAK

Garcia, Gómez eta Letamendik lasterketa garrantzitsuak izango dituzte.

 

 

Oñatiko hiru korrikalarik estatuko lasterketetan parte hartuko dute gaur goizean. Sergio Garcia eta Sara Gómez korrikalariek, Espainiako kros txapelketan lehiatuko dira Meridan eta Iban Letamendi mendi lasterkariak, Espainiako kopako lehen proba puntuagarrian parte hartuko du Aiguafredan (Bartzelona).

Meridan jokatuko den kros txapelketari dagokionean, Euskal Selekzioak bi Oñatiar izango ditu lasterketan. Senior mailan Sergio Garcia eta junior mailan Sara Gómez. Garciak denboraldi bikaina egin du. Hirugarren sailkatu zen Euskadiko kros motzeko txapelketan, eta bostgarren kros luzean. Sergioren hamaikagarren partehartzea izango da Espainiako txapelketan.

Gomezek ere oso maila ona eman du aurten, junior mailako bere lehen urtean. Pista estalian eta baita krosean ere lasterketa bikainak osatu ditu. Pistan bere markarik onenak hobetu ditu 800 (2’31’’) eta 1500 metrokoan (5’07’’). Gipuzkoako Junior mailako txapelduna izan da 800m.-tan, eta Euskadiko seigarrena, maila absolutoan, 1500m.-koan.

Krosean ere, aipagarriak izan dira emaitzak. Eibarko krosa irabazi zuen, Gipuzkoako txapelketan hirugarren sailkatu zen, eta Euskadikoan seigarren. Gomezen hirugarren esperientzia izango da estatu mailako proba batean, izan ere, infantil eta kadete mailetan ere egona da horrelako txapelketa batean.

Emaitza hauen ondorioz, biek ala biek, Euskadiko selekzioaren deia jaso zuten, eta gaur eguerdian Meridan izango dira Euskal koloreak defendatzen. 12:10ean estreinatuko da Sergio Garcia 12 km.-ko lasterketa luzean eta 13:00 berriz, Sara Gomezek 6 km proba egingo du.

Beterano mailan beste bi ordezkari

Jose Luis Garcia eta Ramon Varela korrikalari beteranoak ere, lan bikaina egiten dute denboraldian zehar. Euskadiko kros txapelketan podiumera igo ziren 55 urtetik gorakoen mailan eta horri esker, gazteekin batera, Meridako txapelketan izango dira gaur goizean. Hauek, goiztiarrenak izango dira. 9etan zabalduko dute eta txapelketa 6 km.-ko probarekin.

Iban Letamendi Espainiako kopan

Estatu mailako lasterketekin jarraituz, mendi lasterketei dagokienean, Iban Letamendi Euskal Selekzioko korrikalari oñatiarrak, Espainiako Kopako lehen proba puntuagarrian parte hartuko du gaur goizean Aiguafredan, (Bartzelona). 42 kilometro eta 3000 metroko gorabehera positiboa duen lasterketa izango da. Ostiral goizean adierazi zigunez "oso sentsazio onekin" aurkitu da azken aste honetan, eta maila handia izago den arren, "lasterketa duin bat" egiteko asmoarekin irtengo dela adierazi digu.