Ekoizleak eta herritarrak, gustura Murgialdaiko txakolinarekin
Api. 28, 2013, 3:23 p.m. Leire Kortabarria
Freskoa, bere fruta-zaporearekin, txispa pixka batekin eta garraztasun orekatuarekin: horrelakoa da, egileen esanetan, gaur eguerdian aurkeztu duten Murgialdai baserriko txakolina. Murgialdaiko familia osoa eta haien lagun asko ibili dira ekoizte-lanetan, eta aurkezpenera ere jende asko joan da. Bukaeran, Murgialdaiko ardoa edan dute gehienek, pintxo goxoekin lagunduta.
 |
| Aurkezpena bukatuta, txakolina eta pintxoak. |
Oñatiko baserri askotan egiten zen moduan, Murgialdain ere txakolina egiteko ohitura zegoen, aspalditik, baina utzita zeukaten, azken urteotan berriz heldu dioten arte. Txakolinak Getariako izendapena dauka eta asmoa da Oñatiko taberna eta jatetxeetan ipintzea salgai, oraingoz.
Aurkezpena gaztelekuan egin dute, eta ekitaldiaren zati bat izan da Jose Felix Diaz de Tuesta arrasatearrak egindako argazkiek osatutako diaporama baten emanaldia, ekoizpen-prozesuaren nondik norakoak azaltzeko. Murgialdaiko baserritarrak eta haien lagunak agertzen ziren argazki gehienetan, ekoizpen-prozesu horren protagonistak eurak izan dira-eta.
Bukaeran, gaztelekura joan den jende guztiarendako pintxoak eta tragotxoa eman dituzte.
No hay comentarios:
Publicar un comentario